Var det Vottelauget som innstifta Vottedagen?

Det historiske fotoet: Vottelauget samlast for første gong, og lanserer den første e-boka under Strikkedagene på Sjølingstad hausten 2014, i forkant av publiseringa på sjølve Vottedagen 14. oktober. (Fotograf: Liv F.)

Då vi i det nystifta Vottelauget bestemte oss for å lansere vår første e-bok "Votter fra eventyrskogen" hausten for tolv år sidan, brukte vi den gamle primstaven som rettesnor: Vi valde det første symbolet på vintersida – som ofte er ein vott (... også nokre gonger tolka som ein pavehanske), som har datoen 14. oktober, også kalla den første vinterdagen / vinternatt.

Vottedagen er bursdagen vår
Dette tenkte vi var den perfekte dagen, og brukte ordet Vottedagen då vi fortalde om lanseringsplanane til alle strikkeglade vi kjende. Vottedagen 14. oktober er deretter blitt ein slags felles bursdag for oss i Vottelauget, sidan dette var dagen då votte-eventyret vårt starta for alvor.

Opp gjennom åra har vi feira den magiske datoen 14. oktober m.a. ved å lansere nye votteoppskrifter, og vi har også fleire år arrangert vottedagar på Maihaugen i Lillehammer.

#Vottedagen spreidd til utlandet
På Instagram har vi også brukt emneknaggen #vottedagen når vi har feira med strikk. I dei seinare åra har vi sett at denne emneknaggen har blomstra og inspirert mange til å vise fram sjølvstrikka vottar på denne dagen. Han har spreidd seg til utlandet, spesielt til Sverige, der strikkarar også deler vottefoto, og skriv slikt som "i dag firar man i Norge Vottedagen, som en markering för att vinterhalvåret har börjat". 

Litt som Henrik Wergeland?
Så vi lurer litt på: Var det faktisk vi i Vottelauget som tok i bruk dette ordet først, eller er ordet endå eldre enn 2014? Vi tar gjerne imot synspunkt og historiske fakta! 

For kanskje er vi litt som salige Henrik Wergeland, som vart hylla som "han som innstifta da'n", men som historisk sett ikkje var den som starta feiringa av 17. mai, men som heller vart den som gjennom talar og dikt verkeleg fekk spreidd nasjonaldagen vidare til folket.

Lesetips: I blogg-innlegget Vottelauget feirer Vottedagen (2015) forfatta av Wenche i Vottelauget, kan du lese meir om merkedagane på primstaven, og bakgrunnen for feiringa av Vottedagen.

Og 1. oktober får du vite kva for votteoppskrift vi har valt ut som månadens oppfordring!